ஒரு கல்லை எடுத்து குளத்தில் எறிந்து
அவனிடம் நீ விளையாடுகிறாய்
எழுந்து வரும் அலையாக நீ நினைக்கலாம்
அவன் மூழ்கிய கல்லாவும் இருக்கலாம்
பழகுதலில் நம்பிக்கையை
இருவருமே கொடுத்திருக்க
பொய்யாவும் இருந்திருக்கிறாய்
உண்மையாகவும் இருந்திருக்கிறான்
அவனுக்குத் தெரியாதது எல்லாம்
உனக்குத் தெரிந்திருக்கிறது
உனக்காகவே காத்திருந்த நேரத்திலெல்லாம்
அவன் என்னவாக இருந்திருப்பான்
பைத்தியமாக யோசித்திருப்பாயா நீ
யோசிக்காமல் இருப்பதே பைத்தியம்
உன் வேண்டுதலை மட்டுமே நீ அறிவாய்
உன்னோடு பயணிப்பதில்
அவனிடம் உனக்கான வேண்டுதல் இருக்கிறது
நேசம் பீறிட்டெழும்போதேல்லாம்
மௌனம் கலைக்கச்செய்கிறாய்
ஆறுதலாய் அருகிலிருந்து
நிதானமாக நேசிப்பவனிடம்
ஒவ்வொரு இறகாகப் பிடுங்க
அவன் விடாது சிரித்துக்கொண்டிருக்க
இருவருக்குமான பேரன்பில்
யாரவது ஒருவர் தோற்றுப்போகலாம்
நேசங்களைச் சொல்லிக்கொண்டே
இருந்தவனை
பைத்தியமாவதிலிருந்து
நீ விடுவிக்கிறாயா யமுனா ?
இல்லை
பைத்தியமாவதை புரியவைக்கிறாயா
யமுனா?
