யமுனாவீடு -62

தொடர் கவிதை

- Advertisement -

ஒரு கனவை
கைகளால் உந்தித்தள்ளி
அலறியபடி
விழித்து திகைத்த ஒருவன்
நேற்றைய பொழுதினை
வரிசைப்படுத்தி
எந்த ஒன்றில் சஞ்சலமடைந்தோமென
மௌனமாகத் திரும்பப் பார்க்கிறான்.

இரவிலிருந்து பகலுக்குள்
நிதானமாக இந்த நாளைத்
தெளிவாய் கடக்கும் ஒருவனாகிடவே
மனிதர்களுக்குள் நுழைந்து
நெளிந்து செல்வதாகிட்டது

யாரோ ஒரு கோட்டை வரைய
அதில் நடந்து பழகியவனுக்கு
இன்னொரு கோட்டை
யார் வரையப்போகிறார்களோ
நடப்பதற்கு சிரமம்தான்.

நடந்துசெல்,
நடந்துசெல்,
நடந்துசெல்,
திரும்பிப்பார்க்காமல்
நடந்துசெல்.
வாகனத்தின் பேரிரைச்சலில்
மனம் அமைதியடையுமட்டும்
நடந்துசெல்,
திரும்பிப்பார்க்காமல்
நடந்துசெல்.
பின்தொடர
யமுனா எதிர்ப்படுவாள்,
நீ தொடர்ந்து
நடந்துசெல்.

உள்ளொளியின் உணர்தலில்தான்
சாத்தான் கடவுளாவதும்
கடவுள் சாத்தானாவதும்
நடந்து செல்வதனைத்தையும்
குறிப்புகளாக எழுதிவை
குழந்தையைப்போல
யமுனா கலைத்துப்போடட்டும்

வெட்டவெளியொன்றில்
அமரப்போகும் இடமொன்றை
எந்தப்பறவை காட்டப்போகிறதோ
அதுவரைக்குமான அன்பில் திளைத்திரு
யமுனா எதிர்ப்படுவாள்
பின்தொடர்வாள்.

- வரலாற்றுச் சிறுகதைப் போட்டி – 2022 -
பாண்டித்துரை
பாண்டித்துரைhttps://minkirukkal.com/author/pandiidurai/
பெயர் இராஜேந்திரன் நீதிப்பாண்டி. (அப்பா பெயர் இராஜேந்திரன்). சொந்த ஊர் அ.காளாப்பூர் (சிவகங்கை மாவட்டம்) வணிகவியல் இளங்கலை படித்த நான் தற்போது சிங்கப்பூரில் கட்டுமானத்துறையில் கட்டுமான பாதுகாப்பு பிரிவில் மேலாளராக பணிபுறிகிறேன். 2006 முதல் பாண்டித்துரை எனும் பெயரில் எழுதிவருகிறேன். அவநிதாவின் சொல் & மாயா மது உதயா எனும் இரண்டு கவிதை நூல்களை எழுதியிருக்கிறேன். குறும்படம் மீது உள்ள ஆர்வத்தில் நண்பர்களுடன் இணைந்து சில குறும்பட முயற்சிகள் செய்துள்ளேன்.

தொடர்புடைய பதிவுகள்

படைப்புகள்

- Advertisement -