- Advertisement -
இந்த கவிதைத் தொகுப்பின் முந்தைய பகுதிகளைப் படிக்க இங்கே சொடுக்கவும்
இறந்தவன் பேசுகிறேன்…
குளிரில்லை….. இங்கு
வெயிலில்லை
நேரம் பார்க்கக் காலமும்
இங்கில்லை
இன்பமில்லை….. துவண்டுபோகத்
துன்பமில்லை… ஏனெனில்
வெற்றி தோல்வியுமில்லை…
வெறுப்பில்லை…. கொண்டாட
நட்பில்லை….. பகைவனின்
புன்னகையில் விஷமுமில்லை…
எது மேல்…? எது கீழ்…?
எது உயரம்…? எது தாழ்வு…?
எது அருகே…? எது தூரம்…?
பொருத்திப் பார்த்துப் பொருளுணர
போதிய தரவுகளுமில்லை….
பொறாமை கொள்ள அளவுகோல் இல்லை…
புறம் பேசக் கேட்கும் காதுகளுமில்லை…
கண்களைத் திறந்து
“ஆஹா… எத்தனை ஆனந்தம்” என்றேன்
இல்லாத இவை அனைத்தும்
நில்லாது எனை நோக்கித்
தள்ளாத குறையாய் வந்தேறியது…..
